Zbulohet personi që vendosi tritolin në murin e farmacisë së babait të ministrit të Brendshëm Saimir Tahiri, por ende jo identiteti i tij, i cili mbahet i fshehtë për arsye hetimore. Hetimet sekuestruan pamjet filmike të kamerave të sigurisë të bizneseve pranë objektit ku ndodhi shpërthimi.
Kamerat e një byrektoreje të ndodhur aty pranë, kishin filmuar një person duke vënë tritolin në farmacinë e cila ndodhet në rrugën Kongresi i Manastirit, pranë QSUT –së.
Në foto e siguruara nga “Shekulli Online” shihet atentatori i ngjarjes, i cili ngjitet mbi murin e jashtëm të farmacisë dhe vendos tritolin në pjesën e jashtme të kondicionerit. Shpërthimi në Farmacinë e babait të ministrit të Brendshëm, Saimir Tahiri ka ndodhur rreth orës 02:50, ndërkohë që dy fotot e siguruara nga Shekulli nga kamerat e sigurisë shënojnë orën 02:23
Në pamje shihet një person trupshkurtër, i mbuluar me kapuç në kokë gjë që e bën të vështirë identifikimin e tij, i cili ka ardhur në vendin e ngjarjes me biçikletë.
Sipas policisë i njëjti person ka vendosur edhe eksplozivin te stacioni i autobusit pranë urës te Vasil Shanto, në vendin ku zakonisht parkonte makinën babai i ministrit Tahiri. Aktivizimi i bombës së dytë do të bëhej gjithashtu me telekomandim. Por bomba e cila është konstatuar rreth orës 06:10 është çaktivizuar me shpërthim të kontrolluar nga forcat RENEA .
Ai është filmuar edhe në momentin kur e ka vënë lëndën shpërthyese në bllokun e kondicionerit, në murin anësor të farmacisë dhe kur largohet qetësisht me biçikletë.
Ky person është vërejtur edhe në ngjarjen e tretë të tritolit të pashpërthyer, nga kamerat e sigurisë së një biznesi pranë zonën së “Vasil Shantos”.
