Me ndarjen e çmimeve më të mirëve, në Dibër përfundoi edicioni i 18-të i festivalit “Teatri shqiptar në Maqedoni”.
Çmimi për shfaqjen më të mirë iu nda shfaqjes “Fqinjët” që erdhi si realizim i teatrit të Gjirokastrës në regji të Milto Kutali. Çmimi për regjinë më të mirë i takoi Elmaze Nurës për shfaqjen “Kopraci” të teatrit të Ferizait, ndërsa si aktorja më e mirë u shpall Dajana Nenaj kurse aktori më i mirë Musa Isufi.
Gjatë shtatë netëve të festivalit, me shfaqjet e tyre morën pjesë trupat teatrale nga Kumanova, Tetova, Gjirokastra, Ferizai, Presheva dhe Gjilani. Në natën e fundit para ndarjes së çmimeve, para publikut të Dibrës jashtë konkurrence u shfaq shfaqja “Karnavalet e Korçës” në regji të Altin Bashës të Teatrit Kombëtar të Prishtinës.
“Ju falënderoj për praninë e madhe në të gjitha shfaqjet, me çka edhe një herë dëshmuam se qytetarët e Dibrës e dinë se çfarë është arti dhe të njëjtin me dinjitet e vlerësojnë. I falënderoj pjesëmarrësit për shfaqjet e tyre të suksesshme. Shpresoj se deri vitin e ardhshëm do të realizohet ëndrra jonë, festivali të institucionalizohet nga Ministria e Kulturës së Republikës së Maqedonisë, me çka do të marrim më shumë mjete, ndërsa kjo do të thotë se do të kemi program më të pasur të festivalit”, tha drejtori i Festivalit, Ylber Nuredini duke e shpallur festivalin të mbyllur.
Ky manifestim, që në mënyrë tradicionale mbahet në Dibër edhe këtë vit në mënyrë financiare u mbështet nga Ministria e Kulturës së Maqedonisë së Veriut, me 600 mijë denarë, nga pushteti lokal si edhe prej sponsorëve të tjerë.
