Kryetari i Aleancës për Shqiptarët, Ziadin Sela deklaroi sot se ai dhe subjekti i tij politik mbështesin grevën e punonjësve të arsimit. Sela me këtë rast përkujtoi në amendamentin e partisë së tij për ritje lineare të rrogave, që nuk u pranua nga Qeveria dhe shumica parlamentare.
“Mua më duket absurde dhe hipokrizi nga ana e Qeverisë se tani po bëjnë rolin e viktimës. Po kjo Qeveri në kohën kur u rregullua çështja e rrogës minimale, e refuzoj amendamentin e ASH-së për rritjen lineare të rrogave, që nënkupton rritjen edhe të pagës së arsimtarëve dhe të gjithëve, po të pranohej ky amendament ne sot nuk do ishim në grevë, andaj Qeveria të mos luaj rolin e viktimës. Ne e dimë se sa e kanë hallin tek nxënësit, sepse nuk ka kaluar as një vit, kur u mbyllën shkollat dhe mësimi u zhvillua online”, deklaroi Ziadin Sela, kryetar i ASH-së.
