Tearca drejt ndryshimit: Daut Memishi në krye të garës për komunën
Komuna e Tearcës po përjeton një garë të ngushtë elektorale, por me një drejtim gjithnjë e më të qartë. Kandidati i koalicionit VLEN, Daut Memishi, po konsolidohet si favorit i qartë për postin e kryetarit të komunës, duke sjellë frymën e ndryshimit që shumë banorë e kanë kërkuar prej vitesh.
Sipas të dhënave të fundit nga Qendra për Kërkime Politike dhe Komunikime (CRPC), Memishi kryeson me rreth 61.2% të mbështetjes, përballë kandidatit të AKI-së, Nazim Taipi, që renditet me 38.8%. Diferenca është e dukshme dhe reflekton një lëvizje të qartë të elektoratit drejt një vizioni të ri për komunën.
Fushata e Daut Memishit është ndërtuar mbi tri shtylla kryesore: zhvillimi i infrastrukturës, modernizimi i administratës komunale dhe përfshirja e qytetarëve në vendimmarrje. Ai ka paraqitur plan të detajuar për rrugët lokale, sistemin e ujësjellësit dhe hapjen e programeve për mbështetje të të rinjve që duan të investojnë në Tearcë.
Për dallim nga garat e kaluara, Memishi ka arritur të tërheqë edhe pjesën e votuesve të pavendosur dhe të rinjtë që tradicionalisht kanë abstenuar nga zgjedhjet lokale.
Në takimet me qytetarët, Memishi është përqendruar në problemet konkrete që i prekin çdo ditë banorët – furnizimin me ujë të pijshëm, përmirësimin e rrugëve lokale, pastrimin e mjedisit dhe rikthimin e besimit në institucionet komunale. Ai ka theksuar se zgjidhja e këtyre sfidave nuk kërkon premtime boshe, por menaxhim me përgjegjësi dhe punë të përditshme.
Në anën tjetër, kandidati i AKI-së, Nazim Taipi, ka tentuar të krijojë një front të ri politik përmes bashkëpunimit me kryetarin aktual, Nuhi Neziri, por deri më tani, efekti elektoral i kësaj aleance ka mbetur i kufizuar. Sipas burimeve lokale, shumë banorë e shohin këtë partneritet si vazhdim të të njëjtës logjikë të vjetër politike që nuk solli rezultate konkrete për komunën.
Historikisht, Komuna e Tearcës është drejtuar nga Isen Asani për tri mandate rresht nën siglën e BDI-së, ndërsa më vonë nga Nuhi Neziri. Por pas më shumë se një dekade nën të njëjtën strukturë politike, në Tearcë është krijuar bindja se është koha për ndryshim të qartë – dhe pikërisht këtë po artikulon Daut Memishi me programin e tij.
Nëse trendi i mbështetjes aktuale vazhdon, Tearca mund të jetë një nga komunat e para që do t’i japë mandat qeverisës VLEN-it në këtë cikël zgjedhor. Dhe për shumë qytetarë, kjo do të nënkuptonte jo vetëm ndërrim të emrit në krye të komunës, por fillimin e një epoke të re lokale, me më shumë përgjegjësi, transparencë dhe zhvillim real në terren.
Në një kohë kur qytetarët kërkojnë rezultate, jo retorikë, Daut Memishi po shihet si kandidati që e kupton realitetin e Tearcës dhe di si ta ndryshojë atë në praktikë.
