Një pjesë e qytetarëve marrin borxh, ndërsa një pjesë kursejnë para në llogari bankare. Të dhënat e Bankës Popullore tregojnë se në korrik të këtij viti ka rritje vjetore prej 13 për qind si te kreditë ashtu edhe te depozitat. Kreditë e përgjithshme në bankat vendore në korrik arritën mbi 8,54 miliardë euro. Qytetarët janë të detyruar me gjithsej 4,3 miliardë euro, ndërsa pothuajse aq, 4,2 miliardë, është borxhi përmes kredive të kompanive.
KREDI KORRIK 2025
GJITHSEJ: 8,54 MILIARDË EURO
EKONOMITË FAMILJARE: 4,3 MILIARDË EURO
SEKTORI KORPORATIV: 4,2 MILIARDË EURO
BANKA POPULLORE:
-Në korrik 2025, kreditë e përgjithshme shënuan rritje mujore prej 0,6%, si rezultat i kreditimit të shtuar të të dy sektorëve, që është më e theksuar te sektori “ekonomitë familjare”. Rritja vjetore arrin 13,0% dhe është pasojë e kredive më të larta të të dy sektorëve, me kontribut më të madh të sektorit korporativ.
Të dhënat e Bankës Popullore tregojnë se nga 4,3 miliardë euro që qytetarët i detyrohen bankave, pjesa më e madhe – gjysma ose 2,21 miliardë euro janë për kredi konsumatore, 1,66 miliard euro për kredi banesore. Pjesa tjetër e borxhit është për kredi për makina, në karta krediti dhe bilance negative në llogari rrjedhëse.
KREDI TË PERSONAVE FIZIKË SIPAS QËLLIMIT KORRIK 2025
Konsumatore: 2,21 miliardë euro
Banesore: 1,66 miliard euro
Automobilistike: 6,7 milionë euro
Karta krediti: 140 milionë euro
Bilance negative në llogari rrjedhëse: 105 milionë euro
Edhe këtë muaj qytetarët më së shumti janë detyruar me kredi konsumatore dhe banesore, tek të cilat është shënuar rritje mujore prej 1%, ndërsa në nivel vjetor tek kreditë konsumatore rritja është 9,8%, e tek kreditë banesore 15,3%.
Nga ana tjetër janë kursimet. Depozitat e përgjithshme arritën në 10 miliardë euro, nga të cilat 6,76 miliardë euro janë kursime të ekonomive familjare, ndërsa 2,87 miliardë janë kursimet e kompanive.
DEPOZITA KORRIK 2025
GJITHSEJ: 10 MILIARDË EURO
EKONOMITË FAMILJARE: 6,76 MILIARDË EURO
SEKTORI KORPORATIV: 2,87 MILIARDË EURO
BANKA POPULLORE
-Në korrik, depozitat e përgjithshme realizuan rritje mujore dhe vjetore prej 0,6% dhe 13,0%, përkatësisht. Ndërkohë, ndryshimi mujor dhe vjetor kryesisht i detyrohet rritjes së depozitave të sektorit “ekonomitë familjare”, me rritje më të vogël edhe të depozitave të sektorit korporativ.
Rritja vjetore e kursimeve të ekonomive familjare është 13,3 për qind, ndërsa e sektorit korporativ 14,5 për qind./TV21
