Sot fillon orari dimëror i fluturimeve për vitin 2025/26. Nga Aeroporti “Shën Apostol Pali” në Ohër janë parashikuar pesë destinacione, të cilat do të shërbehen nga tre kompani ajrore.
Nga 27 tetori nga Ohri do të ketë fluturime drejt Bazelit, një destinacion jashtëzakonisht i rëndësishëm, sepse përmes kësaj linje Ohri hapet jo vetëm për turistët nga Zvicra, por edhe për ata nga Franca dhe Gjermania, pasi ky është i ashtuquajturi aeroport evropian që lidh këto tre shtete, theksoi ministri i Transportit, Aleksandar Nikolloski.
Më 30 mars 2026, të dy aeroportet do të lidhen me tre destinacione të reja. Nga Aeroporti Ndërkombëtar i Shkupit, kompania Wizz Air do të rikthejë linjën e rregullt për në Budapest, dhe po atë ditë kompania do të hapë një destinacion të ri pushimi në Itali – Napoli, një destinacion për të cilin pritet kërkesë shumë e madhe. Po më 30 mars 2026, Aeroporti “Shën Apostol Pali” në Ohër do të lidhet me Milanon. Destinacioni i dhjetë i ri është linja nga Shkupi për në Gjenevë, të cilën EasyJet do ta rikthejë më 3 nëntor.
Aeroporti Ndërkombëtar i Shkupit dhe Aeroporti “Shën Apostol Pali” në Ohër kanë shërbyer gjithsej 2.585.096 pasagjerë në nëntë muajt e parë të këtij viti, që paraqet një rritje prej gjashtë për qind krahasuar me të njëjtën periudhë të vitit të kaluar. Në të njëjtën periudhë është shënuar edhe rritje e numrit të fluturimeve me tre për qind, përkatësisht në të dy aeroportet janë realizuar 20.141 fluturime nga fillimi i vitit deri në shtator.
Përmes Aeroportit Ndërkombëtar të Shkupit janë transportuar 2.375.264 pasagjerë, që është 5,4 për qind më shumë se vitin e kaluar, ndërsa Aeroporti “Shën Apostol Pali” në Ohër ka shënuar një rritje dyshifrore prej 16,2 për qind, me 209.832 pasagjerë të transportuar.