Më shumë se gjysma e popullsisë në rajonin evropian “të mbuluar” nga Organizata Botërore e Shëndetësisë (OBSH) mund të infektohet nga Omicron brenda dy muajve të ardhshëm, paralajmëroi të martën agjencia e OKB-së.
Sipas medieve të huaja, përcjell Telegrafi, Dr. Hans Kluge u tha gazetarëve gjatë një konference për shtyp se Omicron “përfaqëson një valë të re nga perëndimi në lindje” që përfshin 53 vendet që monitoron OBSH Europe.
Sipas të dhënave, më shumë se shtatë milionë infeksione u konfirmuan në të gjithë rajonin në javën e parë të vitit 2022, më shumë se dyfishi gjatë një periudhe dyjavore.
“Deri më 10 janar, 26 vende raportojnë se mbi një për qind e popullsisë së tyre po infektohet me COVID-19 çdo javë”, tha Kluge.
Pesëdhjetë vende kanë raportuar tani raste të Omicron me variantin “duke u bërë shpejt virusi dominues në Evropën Perëndimore”, shtoi ai.
“Me këtë ritëm, Instituti për Metrikat dhe Vlerësimin e Shëndetit (IHME) parashikon që më shumë se 50% e popullsisë në rajon do të infektohet në gjashtë deri në tetë javët e ardhshme”, tha ai.
Provat kanë treguar se Omicron është shumë më i transmetueshëm se lloji origjinal i virusit ose varianti Delta.
Fjalimi i Kluge vjen vetëm pak ditë pasi shefi i OBSH-së, Dr. Tedros Ghebreyesus Adhanom, paralajmëroi kundër përshkrimit të Omicron si “të butë”, duke theksuar se “ashtu si variantet e mëparshme, Omicron po shtron njerëzit në spital dhe po vret njerëz”.
