Rikthehet përsëri vala e të nxehtit, prej nesër temperaturat priten të arrijnë deri në 37 gradë celsius, njoftojnë nga Drejtoria për Punë Hidrometeorologjike. Sipas këtij institucioni, termometri pritet të shënojë temperaturat më të larta ditën e mërkurë dhe të enjte, gjegjësisht 38 gradë celsius.
Nga Drejtoria për Punë Hidrometeorologjike njoftojnë se nesër do të mbizotërojë mot i ngrohtë dhe stabil, me vranësira të vogla deri në mesatare, ndërkaq sipas tyre, do të fryejë erë e lehtë verilndore.
Mot i ngjajshëm pritet edhe për ditët në vazhdim, por me rritje graduale të temperaturave. Të marten temperaturat maksimale do të jenë nga 30 deri në 37 gradë celsius, ndërsa të mërkurën dhe të enjten nga 31 deri në 38 gradë celsius.
Vala e nxehtësisë rikthehet pas uljes së dukshme të temperaturave në ditët e fundit të javës së kaluar ku termometri ka shënuar temperatura të ulëta të mëngjesit, nga 10 deri në 19 gradë celsius, ndërsa në disa pjesë të vendit ka mbizotëruar mot me vransira, reshje të shiut, erëra dhe bubullima.
