Kryeministri Hristijan Mickoski dhe lideri opozitar i LSDM-së, Venko Filipçe do të takohen në Qeveri nesër në ora 14:00.
“Në përputhje me komunikimin publik dhe iniciativat e dërguara dhe gatishmërinë e treguar nga të dyja palët, nesër në ora 14:00 është caktuar takimi i kryeministrit Hristijan Mickoski dhe kryetarit të LSDM-së, Venko Filipçe”, bëjnë të ditur nga Qeveria.
Në një deklaratë për mediat në Shtip, Mickoski shprehu gatishmërinë për takim me Filipçen, i cili sot bëri thirrje për dialog politik dhe social.
Filipçe në një konferencë për media tha se pas tragjedisë në Koçan, qytetarët kanë reaguar me revoltë, sistemi nuk po funksionon siç duhet dhe siç theksoi, fajtorë për këtë janë të gjitha partitë politike. Fushat ku nevojitet një qasje sistematike, sipas Filipçes, janë arsimi, shëndetësia, drejtësia, mjedisi, partishmëria dhe politizimi.
Kryeministri Mickoski, megjithatë, tha se kjo është një temë serioze që po diskutohet.
“Nëse ka një plan siç kanë paralajmëruar, unë jam i gatshëm ta pres kryetarin e LSDM-së në një takim për të shpjeguar planin, për ta dëgjuar planin sepse janë kohë të rënda, unë jam njeri serioz, janë në rrezik gjëra serioze dhe më e pakta që duhet bërë është të performoj në skenë publike. Nëse ai me të vërtetë ka një plan dhe një dëshirë për të ndihmuar, unë jam në dispozicion në çdo kohë për të riorganizuar orarin tim, në mesnatë, pas mesnate, sa herë që ai thotë, atëherë le të dëgjojmë planin e tij dhe të shohim nëse mund të zgjidhet ndonjë gjë në atë plan” tha Mickoski.
