Gjatë ditëve të verës, temperaturat e larta mund të paraqesin rrezik për shëndetin, sidomos për fëmijët, të moshuarit dhe personat me sëmundje kronike. Për të shijuar bukurinë e bregut të liqenit të Strugës në mënyrë të sigurt, ju rekomandojmë të merrni këto masa paraprake:
Shmangni ekspozimin e drejtpërdrejtë në diell në orët më të nxehta (11:00 – 16:00). Qëndroni në hije sa më shumë të jetë e mundur.
Pini mjaftueshëm ujë edhe nëse nuk ndiheni të etur. Dehidratimi ndodh shpejt gjatë vapës.
Përdorni kapele, syze dielli dhe krem mbrojtës nga rrezet UV, duke e aplikuar disa herë gjatë ditës.
Vishni rroba të lehta, me ngjyrë të hapur dhe pambuku, që ndihmojnë trupin të freskohet.
Kini kujdes shenjat e mbinxehjes: marramendje, djersitje e tepërt ose mungesë djersitjeje, dobësi, të përziera apo humbje të vetëdijes. Në këto raste, kërkoni menjëherë ndihmë mjekësore.
Freskohuni me ujë të liqenit, por mos hyni menjëherë në ujë shumë të ftohtë nëse jeni tepër të nxehur – ndryshimi i menjëhershëm i temperaturës mund të shkaktojë probleme.
Kujdes të veçantë për fëmijët dhe të moshuarit, të cilët janë më të ndjeshëm ndaj rrezikut të goditjes nga i nxehti.
Shijojeni verën dhe liqenin me përgjegjësi! Ruani shëndetin tuaj dhe të familjes suaj.
(Struga Ekspres)
