Portalet maqedonase të afërta me pushtetin aktual e shpallin Muhamed Zeqirin armik të partisë së Nikolla Gruevskit, VMRO-DPMNE-së. “Promovues i përhapjes së urrejtjes ndaj politikave të VMRO-së”, e kanë quajtur disa portale të afërta me Gruevskin, kryeredaktorin e televizionit Alsat, menjëherë pas transmetimit të emisionit “Rruga drejt” në të cilën i ftuar ishte lideri i opozitës Zoran Zaev. Përkundër shikueshmërisë rekorde dhe vlerësimeve pozitive nga vetë qytetarët përmes komenteve të tyre nëpër rrjetet sociale, portalet e afërta me pushtetin konstatojnë të kundërtën. “Opinioni nuk i mori përgjigjet e nevojshme, sepse gazetari Zeqiri nuk i parashtroi pyetjet”, shkruajnë portalet në fjalë të cilat për nga titulli dhe përmbajtja, që në shikim të parë bëjnë të qartë se janë produkt i një qendre të cilat madje i sugjerojnë kryeredaktorit të Alsatit Muhamed Zeqiri edhe disa pyetje që sipas qejfit të tyre do të duhej t’ia parashtronin Zoran Zaevit. Kishte edhe tentime indirekte për të kërcënuar Zeqirin në forma të ndryshme siç është edhe vetë pyetja që parashtrojnë portalet ku thuhet: A mundet që dikush të publikojë materiale për Zeqirin? Këto shkrime i ka dënuar edhe Shoqata e Gazetarëve të Maqedonisë, duke i vlerësuar si skandaloze dhe tentim për të shantazhë. Kryetari i SHGM-së thotë se kritikat për punën e personave publik, përfshirë këtu edhe të gazetarëve, janë të pranueshme, por të njëjtat sipas Selmanit duhet të kenë një gjuhë korekte dhe qëllim të mirë, si dhe ti shërbejnë debatit publik për çështje me interes të përgjithshëm.
“Fakti që ky shkrim kundër kryeredaktorit të Alsatit është botuar në mënyrë të sinkronizuar në disa media që mbështesin politikën e kësaj qeverie dhe gjuha që përdoret në këtë shkrim më bën të dyshoj që qëllimi i këtij shkrimi nuk është kritika qëllim mire, kritika me qëllim që opinioni të informohet më mirë, por ka qëllim që ta diskreditojë kryeredaktorin e Alsatit dhe t’i shërbejë propagandës politike të partisë në pushtet. Në këtë shkrim skandaloz të botuar në këto media unë shoh një gjuhë shantazhi që përdoret kundër Muhamedit dhe për ne si Shoqatë e gazetarëve është e papranueshme dhe e dënojmë me forcë”, tha Naser Selmani, kryetar i SHGM-së.
Krahasimet që portalet e afërta me Qeverinë i bëjnë kryeredaktorit të televizionit Alsat me gazetarët e regjimit të Millosheviqit, kryetari i SHGM-së, Naser Selmani i quan qesharake dhe të pabaza. Selmani thotë se janë pikërisht këta portale ato që ia kanë kaluar edhe propagandës së Millosheviqit.
“Këtyre mediave edhe propaganda më e zezë e Millosheviçit do t’ua kishte zilinë se në çfarë mënyrë keqpërdorin gazetarinë për ti shërbyer politikës së Gruevskit. Këtyre njerëzve që punojnë në këto ueb portale të cilët unë nuk mund ti quaj as gazetarë sepse nuk e kanë guximin që t’i nënshkruajnë shkrimet e tyre, ju sugjeroj që në vend se të mbajnë leksione gazetarie Muhamet Zeqirit, më mirë do të ishte që ti sugjerojnë dhe ta bindin kryemeinistrin që ta mbledh guximin ta pranojë ftesën e redaktorit Zeqiri dhe të vijë në Alsat dhe të përballohet me pyetjet e gazetarit”, u shpreh Naser Selmani, kryetarë i SHGM-së.
Ndryshe edhe në emisionin e mbrëmshëm “Rruga drejt” Muhamed Zeqiri i bëri ftesë publike kryeministrit Nikolla Gruevski që të mer pjesë pjesë në një nga edicionet ku do të diskutohej për temat aktuale dhe rastin “Puç” për të cilin ai thotë se ka qenë i shantazhuar nga opozita.
