Sektori i Punëve të Brendshme të Tetovës bën të ditur se pas disa aktiviteteve operative është kryer kontroll në Gostivar, ku është arritur kapja e personit I.XH (24), nga fshati Debresh.
Ai dyshohet për gjithsej 75 vepra penale prej të cilave 51 cilësohen si vjedhje të rënda, 18 cilësohen si vjedhje në tentativë, pesë të tjera cilësohen si marrje të veturave dhe një vjedhje.
Të gjitha këto vepra janë vërtetuar me ADB, video materiale dhe dëshmi tjera. Këto vepra janë kryer në Gostivar, Tetovë, Strugë, Ohër, Kërçovë, Resnjë e Manastir.
Gjatë kontrollit, të arrestuarit i është gjetur një pistoletë, që është konstatuar se është siguruar nga vjedhja në Tetovë, më 3 janar të këtij viti. Gjithashtu, është gjetur edhe vetura ”Audi” që është marrë në Strugë, por janë gjetur edhe mjete tjera. Pas marrjes në pyetje, I.XH i ka pranuar veprat dhe ka sqaruar se si ka vepruar. Ai është identifikuar edhe nga një person, viktimë e plaçkitjeve të tij.
