Jeton Shaqiri përmes rrjetit social facebook shkruan se nga shtetformues shqiptarët në Maqedoni tani shihen si spektatorë.
“Nga Shtetformues në Spektatorë – Si Po Shitet Interesi i Shqiptarëve në Maqedoni?
Sot në Maqedoninë e Veriut po rikthehet një model qeverisës që kujton vitet e paraluftës së 2001-it, ku shqiptarët përjashtoheshin plotësisht nga vendimmarrja dhe trajtoheshin si qytetarë të dorës së dytë.
Takimi i sotëm mes liderëve maqedonas Hristijan Mickoski dhe Venko Filipçe, përfaqësues të dy partive kryesore maqedonase në pushtet dhe opozitë, është dëshmi e vazhdimësisë së politikave monoetnike dhe antishqiptare. Ky takim nuk është rastësi, por pjesë e një tendence të qartë për të vendosur fatin e shtetit pa përfshirjen e shqiptarëve, pavarësisht se ata janë populli i dytë më i madh dhe popull shtetformues në Maqedoninë e Veriut.
Më shqetësues është fakti se përfaqësuesit shqiptarë në qeveri jo vetëm që nuk reagojnë, por në disa raste bëhen avokatë mbrojtës të kësaj politike monoetnike, duke arsyetuar përjashtimin e shqiptarëve publikisht në rrjetet sociale . Ky është një vetëpërjashtim i dëmshëm që legjitimon degradimin e marrëveshjes së Ohrit dhe shkeljen e parimeve të demokracisë multietnike.
Demokracia multietnike, që do të duhej të ishte themeli i stabilitetit dhe bashkëjetesës në Maqedoninë e Veriut, po zbrazet nga përmbajtja e saj. Pjesëmarrja formale e shqiptarëve në institucione po përdoret vetëm si fasadë për të ruajtur imazhin ndërkombëtar të vendit, ndërsa në vendimmarrje ata nuk kanë asnjë ndikim real. Heshtja e partive shqiptare në qeveri, të cilat herë shmangen dhe herë justifikojnë përjashtimin e shqiptarëve, është dëshmia më e qartë e kapjes së tyre politike dhe mungesës së vullnetit për të mbrojtur interesat kombëtare shqiptare.
Shkelja e Marrëveshjes së Ohrit po bëhet gjithnjë e më e dukshme, ndërsa shqiptarët margjinalizohen në proceset kyçe politike dhe institucionale. Nëse kjo vazhdon, demokracia multietnike do të mbetet vetëm një iluzion, dhe realiteti i Maqedonisë së Veriut do të kthehet në një shtet ku shqiptarët janë të pranishëm vetëm në statistika, por jo në vendimmarrje” – shkruan Jeton Shaqiri.
