Kuqezinjtë e Tetovës shkruajnë histori: Shkëndija eliminon FCSB-në dhe siguron Evropën!
Shkëndija e Tetovës ka regjistruar një nga faqet më të ndritura në historinë e saj dhe në atë të futbollit të Maqedonisë së Veriut. Kuqezinjtë kanë befasuar gjithë kontinentin duke eliminuar gjigantin rumun FCSB (ish-Steaua e Bukureshtit), një emër i madh i futbollit evropian, dhe duke siguruar të paktën pjesëmarrjen në fazën e grupeve të Ligës së Konferencës.
Në një atmosferë të zjarrtë në “Arena Kombëtare” të Bukureshtit, përpara mbi 30 mijë tifozëve vendas, Shkëndija tregoi zemër, karakter dhe një shpirt gare për t’u admiruar. Ndonëse FCSB shihej si favorit absolut, djemtë tetovarë nuk u tërhoqën asnjë çast. Goli i avantazhit për vendasit erdhi në minutën e 28-të me anë të Cisottit, por reagimi i Shkëndijës ishte i menjëhershëm. Vetëm pesë minuta më vonë, Liridon Latifi barazoi shifrat me një gol spektakolar, duke heshtur stadiumin dhe rikthyer shpresën.
Kur dukej se ndeshja do të përfundonte në barazim, në skenë doli Vane Krstevski. Me një goditje të saktë në minutën e 87-të, ai vulosi një fitore historike 1-2 për Shkëndijën – rezultat që i kualifikon kuqezinjtë për në raundin e tretë të Ligës së Kampionëve dhe u siguron atyre pjesëmarrjen në fazën e grupeve të Ligës së Konferencës, një arritje e paprecedent për futbollin shqiptar në Maqedoninë e Veriut.
Ky sukses i jashtëzakonshëm është një krenari jo vetëm për klubin tetovar, por për gjithë shqiptarët. Për herë të parë, një ekip nga Maqedonia e Veriut siguron Evropën e vërtetë që në raundin e dytë të Ligës së Kampionëve.
Në raundin e tretë, Shkëndija do të përballet me një tjetër sfidë të madhe – Qarabagun e Azerbajxhanit. Por tashmë, kuqezinjtë janë një emër që ka fituar respektin e të gjithëve. Evropë, jemi këtu!
