Fetai nga Tetova: VLEN më i fortë se kurrë, opozita ka humbur rrugën në oborr!
Zëvendëskryeministri dhe një nga liderët e VLEN-it, Arben Fetai, sonte nga tubimi i madh në Tetovë doli me një mesazh të fortë përball opozitës, duke theksuar se VLEN është më i fuqishëm se kurrë dhe gati për fitore në çdo komunë.
“VLEN asnjëherë nuk ka qenë më i fortë dhe më kompakt. Pa mëdyshje, do të fitojmë çdo komunë nga Likova deri në Strugë”, tha Fetai, duke shtuar se opozita shqiptare ka humbur rrugën dhe nuk ka më asnjë legjitimitet.
Ai ironizoi lëvizjet e tyre politike ndër vite, duke kujtuar se pas Marrëveshjes së Ohrit shpallnin se “çështja shqiptare është mbyllur” dhe shpikën agjendën e gjelbër. “Sapo u formua VLEN, ata ikën nga e gjelbra dhe dolën tek agjenda multietnike. Tash 15 muaj e kanë braktisur edhe atë dhe janë kthyer tek AKI. Përballë kemi një opozitë tërësisht të delegjitimuar, pa ide dhe pa asnjë propozim për jetën e shqiptarëve”, theksoi ai.
Në këtë tubim morën fjalën edhe kryetari i Komunës së Tetovës, Bilall Kasami, si dhe liderët e VLEN-it, Izet Mexhiti, Zeqirija Ibrahimi dhe vetë Fetai. Në tubim morën fjalën edhe shefi i shtabit të përgjithshëm, Adnan Azizi si dhe shefi i shtabit për Tetovën të cilët kërkuan mobilizim të plotë deri në ditën e zgjedhjeve.
