Osmani: Tema e integrimeve në BE nuk duhet të jetë pjesë e llogarive ditore partiake
Bujar Osmani, kandidat për kryetar të Çairit dhe ish-ministër i Punëve të Jashtme, dha një mesazh të qartë se është e nevojshme uniteti kombëtar rreth integrimit evropian të vendit, pasi iu bë pyetja për të komentuar qëndrimin e Venko Filipçes për ndryshimet kushtetuese.
“Unë mendoj se rruga më e mirë që Republika e Maqedonisë së Veriut të bëhet pjesë e Bashkimit Evropian është të mbajë rregullat që i kemi dakorduar. Secili prej atyre rregullave na mbron, sepse siç kam thënë, ato rregulla janë filtër që të mos ketë kërkesa të reja”, deklaroi Osmani, duke paralajmëruar se çdo devijim do të nënkuptonte hyrje në “territor të panjohur” ku secili mund të imponojë kushte të reja.
Në përgjigjen e tij, Osmani hapi një tezë konstruktive, një propozim për marrëveshje politike kombëtare sipas shembullit të Kroacisë, me të cilën tema e BE-së nuk do të përdorej më për sulme ndërpartiake.
“Sa herë kam kërkuar, hajde të nënshkruajmë marrëveshje ndërpartiake, që tema Bashkimi Evropian të mos na bëhet pjesë e polemikave ditore politike. Hajde të garojmë për arsim, për shëndetësi, por për BE-në – jo. Këtë e kam marrë nga shembulli i Kroacisë. Kur kryeministri dhe lideri i opozitës i dhanë dorën njëri-tjetrit dhe thanë, kurrë të mos polemizojnë për këtë temë, gjërat shkuan përpara. Dhe çfarë ndodhi? Ka pasur polarizim të madh, por kurrë ndonjë politikan opozitar në Bruksel nuk ka folur kundër qeverisë për temën e BE-së”, tha Osmani.
Ai bëri thirrje që të gjitha partitë politike në shtet të tregojnë pjekuri dhe të ndajnë përgjegjësinë për agjendën evropiane.
“Hajde të nënshkruajmë marrëveshje të gjitha partitë politike që për temën Bashkimi Evropian nuk do të kritikojmë, nuk do të sulmojmë, do ta marrim përgjegjësinë së bashku. Dhe hajde të respektojmë marrëveshjet, sepse ato na mbrojnë ne. Ky është qëndrimi ynë”, përfundoi Osmani.
