Drejtoresha e Agjencisë së Punësimit, Biljana Jovanovska, e ftuar në emisionin “Magazina Ekonomike” në Alsat tha se personat që kanë humbur punën, për shkak të krizës ose nëse kontrata e tyre e punës me afat të caktuar ka skaduar, ata kanë të drejtën e kompensimit monetar.
Siç specifikoi ajo, për të marrë ndihmën financiare, personi duhet të ketë të paktën 9 muaj punë të vazhdueshme ose nëse punësimi ka pasur ndërprerje, atëherë në 18 muajt e fundit ai duhet të ketë punuar të paktën 12 muaj.
Sa i përket sigurimit shëndetësor, në rast të humbjes së vendit të punës, Jovanovska tha:
“Personat që nuk kanë përmbushur kushtet për kompensim monetar, përmes Fondit të Sigurimit Shëndetësor kanë të drejtë të përdorin sigurimin shëndetësor. Nëse bashkëshorti ose bashkëshortja është në sigurim të detyrueshëm shoqëror, ata do të përdorin sigurimin shëndetësor përmes bashkëshortit ose bashkëshortes”, specifikoi Jovanovska.
