Akoma asnjë marrëveshje konkrete nuk është arritur nga partitë politike shqiptare për koalicione të mundshme parazgjedhore. Ideja e koalicionit trepalësh mes Aleancës për Shqiptarët, Alternativës dhe Besës rezulton e dështuar. Sekretari i përgjithshëm i Alternativës, Skender Rexhepi, beson në një marrëveshje pozitive me partinë e Selës por e hedh poshtë mundësinë për koalicion me Besën.
Jemi në bisedime të vazhdueshme me Aleancën në këtë rast, edhe në nivel të Komisioneve, edhe në nivel të kryetarëve të partive dhe besojmë që përmbyllja e këtyre bisedimeve shpresoj dhe besoj që do të jetë pozitive dhe do të ndodhë brenda disa ditëve- tha Skender Rexhepi, Alternativa.
A hidhet përfundimisht poshtë mundësia për një koalicion me Besën?
Po. Gjithsesi. Nëse vjen deri te pika që ju e përmendni, në asnjë rast, Alternativa dhe asnjë organ partiak nuk do të pranonte të ulet në një tavolinë me njerëz të cilët kanë thyer çdo shpresë dhe ideal tek votuesit tonë të përbashkët.
Shuarjen e idesë për një koalicion trepalësh nuk e konfirmojnë dy partitë e tjera, ASH-ja dhe Besa. Sela, i cili i pari e shpalosi këtë ide në publik, sot për Alsat përsëri komunikoi se punohet në drejtim të marrëveshjes, megjithatë, më herët kishte thënë se vendimi do të bëhej publik më 3 janar.
Besoj brenda një jave ne do ta përmbyllim për korrektesë edhe ndaj opinionit dhe do të dihet saktë me kë do të bëjë koalicion Aleanca për Shqiptarët por sido që të jetë, koalicioni më kuptimplotë që një subjekt politik mund të bëjë, është koalicioni me opozitarin e vërtetë dhe opozitari i vërtetë është qytetari- deklaroi Ziadin Sela, kryetar i ASH-së.
Lëvizja Besa konfirmon se është në komunikim të vazhdueshëm më ASH-në por e ka të paqartë se pse s’ka thirrje konkrete për takim trepalësh.
Lëvizja Besa
“Jemi në komunikim të rregullt me Aleancën për Shqiptarët, edhe përkundër bindjes tone, por për hir të dhënies së shansit kemi pranuar kërkesën e tyre për të biseduar për një koalicion trepalësh, mirëpo ende nuk kemi përgjigje pse nuk po ndodh thirrja konkrete në ditë të caktuar për takim trepalësh qoftë mes kryetarëve të tre partive apo grupeve negociuese.”
Ndërkohë, PDSH-ja tashmë ka vendosur të shkojë e vetme në zgjedhje. Koalicionet e mundshme paszgjedhore, partia e Menduh Thaçit do t’i kushtëzojë me postin e zëvendëskryeministrit me nënshkrim të lidhur.
Ne kemi vendosur që të shkojmë vetë në zgjedhje. Kemi paraqitur dy parakushte ose mundësi të bisedimeve me partnerët e ardhshëm të koalicionit paszgjedhor se si duket koalicion parazgjedhor nuk do të ketë. Çështja e parë është eliminimi i BDI-së prej qeverisjes pas këtyre zgjedhjeve dhe çështja e dytë të cilën e kërkojmë ne, një bisedë serioze për postin e zëvendëskryeministrit që duhet ta marrë PDSH-ja- tha Menduh Thaçi, kryetar i PDSH-së.
Edhe BDI-ja do të shkojë e vetme në zgjedhje. Në vazhdimësi, partia e Ahmetit ka bërë thirrje për bashkimin e partive të tjera në një bllok të vetëm garues në zgjedhjet parlamentare.
Fatlume Dervishi
