Gjermania do të njoh patent shoferët e Maqedonisë, ashtu që të gjithë qytetarët që udhëtojnë drejt Gjermanisë nuk kanë nevojë për patent shoferi ndërkombëtare. Ndërsa ata që kanë qëndrim dhe punojnë në Gjermani me kërkesë të tyre mund të bëjnë ndërrimin e patent shoferit, duke u pajisur me ate gjermane. Kjo mundësi parashihet në Deklaratën për njohjen dhe ndërrimin e patent shoferave, që do ta nënshkruajnë sot ministri i brendshëm Oliver Spasovski dhe ambasadori gjerman në Shkup, Tomas Gerberih.
Me nënshkrimin e sotëm do të hyjë në fuqi marrëveshja dhe se me këtë qytetarët e Maqedonisë që jetojnë dhe qëndrojnë në Gjermani nuk kanë nevojë të hyjnë në testime teorike dhe praktike apo të kalojnë procedura të tjera burokratike.
Maqedonia ka nënshkruar marrëveshje të tillë me disa shtete siç janë Spanja, Italia, Srbija, Shqipëria, Mali i Zi, Austria, Bosnjë Hercegovina, ndërsa në procedurë është nënshkrimi i marrëveshjeve me Kosovën, Turqinë, Britaninë e Madhe dhe vende tjera.
