Aleanca për shqiptarët ka dorëzuar emrin e kandidatit për ministër të shëndetësisë. Nga kjo parti hedhin poshtë spekulimet se atyre u është ofruar ndonjë ministri apo post tjetër. Por edhe nëse do t’u ofrohej, thonë se nuk do të pranonin një gjë të tillë.
Nënkryetari i Aleancës për Shqiptarët Elmi Aziri për tv21 tha se ata tashmë kanë vendosur që Vullnet Ferati të jetë zëvendësues i Arben Taravarit në krye të Ministrisë së Shëndetësisë.
“Ne kemi qenë shumë të qartë dhe tashmë kemi dorëzuar emrin e Vullnet Feratit si kandidat për ministër të Shëndetësisë. Tani presim që edhe partitë tjera të kompletojnë propozimet e tyre me emrat dhe ato të propozohen në Kuvend nga kryeministri Zoran Zaev”, tha Elmi Aziri, nënkryetar i Aleancës për Shqiptarët.
Nga LSDM theksojnë se nuk ka mosmarrëveshje në mes të partive politike të koalicionit qeverisës dhe se ende po zhvillohen bisedime për çështjet e hapura në lidhje me zgjedhjet kadrovike. Sipas tyre, të gjitha opsionet janë të hapura.
“Mes partive politike të koalicionit qeveritar nuk ka mosmarrëveshje. Qeveria, institucionet dhe bashkëpunimet funksionojnë në mënyrë normale dhe në interes të qytetarëve dhe në drejtim të plotësimit të reformave prioritare. Bisedat mes partive dhe brenda partive për disa çështje të hapura në lidhje me zgjedhjet kadrovike ende po zhvillohen. Në këtë drejtim, tashmë kemi kumtuar se të gjithë opsionet janë të hapura dhe pritet që së shpejti të sillen vendime”, nga LSDM.
Nga BDI nuk morëm përgjigje rreth asaj se deri ku ka arritur procesi i zgjedhjes së emrave të ri për 2 postet që i takojnë kësaj partie.
Ata duhet të zgjedhin se kush do të jetë ministri i ri pa resor që do zëvendësojë kryetarin e tanishëm të Strugës Ramiz Merkon dhe zëvendës-ministër për arsim, pozitë me të cilën udhëhiqte kryetari aktual i Komunës së Çairit, Visar Ganiut.
Javën e kaluar kryeministri Zoran Zaev në lidhje me këtë çështje theksoi se emrat e ri të vendeve boshe në qeveri do të shpallen brenda disa ditëve, mirëpo deri më sot ende nuk janë shpallur.
“Unë shpresoj se mbetën edhe disa ditë deri sa ta shpallim emrin e ministrit të ri, por edhe t’i plotësojmë postet e tjera, siç është posti i zv/ministrit dhe të një ministri pa resor”, tha Zoran Zaev, Kryeministër i RM-së.
Ndryshe, edhe përkundër spekulimeve në opinion se ka mosmarrëveshje mes partive të koalicionit qeveritar rreth asaj se kush do të udhëheqë Ministrinë e Shëndetësisë, një gjë të tillë e përgënjeshtrojnë vetë partitë. Ndryshe mesazhe për këtë ka pasur edhe nga eurokomisioneri për zgjerim Johanes Han dhe ambasadori i SHBA-ve, Xhes Bejli. Ata kanë theksuar se në këtë moment qeveria dhe partitë e koalicionit qeveritar duhet të fokusohen në realizimin e reformave.
