Në disa broshura të publikuara nga Drejtoria e Doganave të Maqedonisë vërehen skandale dhe përdhosje të gjuhës shqipe. E përditshmja “lajm” ka publikuar disa fotografi të broshurave ku vërehen gabime të mëdha drejtshkrimore por edhe tekste të pakuptueshme.
“Në dy broshura të përgatitura nga kjo drejtori, e që janë përkthyer edhe në gjuhën shqipe, vërehen aq shumë gabime, saqë nëse udhëhiqeni nga udhëzimet e versionit shqip të kësaj broshure, ekziston rreziku të paguani doganë jo një herë por tre herë. Megjithë gabimet e shumta, zëvendësdrejtori i doganës Lavdrim Veliu e ka publikuar këtë broshurë edhe në profilin e tij në facebook, me siguri duke e konsideruar si të arritur të madhe. Por pasi të lexoni broshurën, do të konstatoni edhe ju se shqipja e Lavdrimit me të vërtetë nuk është për tu lavdëruar”, thekson gazeta. Nuk është ky rasti i vetëm ku në institucione që drejtohen nga shqiptarët, ka gabime masive drejtëshkrimore të gjuhës shqipe dhe përdhosje brutale.
