Aleanca për Shqiptarët do të mbetet pjesë e qeverisjes me LSDM dhe se kjo ka ardhur pas takimit të krerëve të këtyre dy partive, ku janë tejkaluar tensionet e ngritura gjatë fushatës zgjedhore.
Siç meson INA, në takimin midis kryeministrit Zoran Zaev dhe liderit të ASH është biseduar për të gjitha çështjet e hapura dhe se Sela ka bërë të ditur se angazhimi i tyre do të jetë aktiv në realizimin e programit të ASH në kuadër të reformave, që është përcaktim i qeverisjes së re.
Përveç kësaj Sela i ka përsëritur Zaevit qëndrimet se në zgjedhje janë shkelur rekomandimet e Pribesë si dhe janë bërë lëshime të tjera, që nuk duhet të përsëriten. Në këtë takim është biseduar edhe për detaje të tjera për funksionimin e qeverisjes si dhe miratimin e shpejtë të Ligjit për gjuhët.
Ndërkohë, ASH brenda pak ditëve do të nominojë edhe emrin e ministrit të ri të shëndetësisë, pasi që Arben Taravari u zgjodh kryetar i Gostivarit.
Nga ana tjetër, me këtë siç mësohet shuhen shpresat që PDSH të bëhet pjesë e Qeverisë. Siç mësohet kjo parti kishte shprehur gatishmërinë për tu bërë pjesë e koalicionit qeverisës, nëse shkon ASH. Përveç kësaj ASH do të ruajë bashkëpunimin me Lëvizjen BESA. (INA)
