Energjia elektrike shtrenjtohet nga 1 janari, vendosi Komisioni Rregullator për Energjetikë. Nga Viti i Ri, qytetarët do të paguajnë energji elektrike më të shtrenjtë për 2,45% në bllokun e parë dhe për 2,87% në bllokun e dytë. Çmimi për bllokun e tretë rritet për 3,32%, ndërsa për të katërtin për 3,84%. Për tarifën e lirë, Rregullatori vendosi që çmimi të rritet për 2,50%. Sipas kreut të Komisionit, Marko Bislimoski, rritja është minimale krahasuar me kërkesën që kishte ardhur nga EVN Home. Ajo lëvizte nga 7,6 deri gati në 12 për qind, varësisht nga blloqet.
Korrigjime sipas blloqeve:
Blloku i parë: +2,45%
Blloku i dytë: +2,87%
Blloku i tretë: +3,32%
Blloku i katërt: +3,84%
Tarifa e lirë: +2,50%
“Një amvisëri që ka konsum vetëm në bllokun e parë prej 210 kilovat-orë dhe tarifë të lirë 227 kilovat-orë, në këtë rast fatura mujore rritet për 57 denarë, respektivisht për 2,28 për qind”, tha Marko Bislimoski, Kryetar i KRRE-së.
Bislimoski theksoi se pothuajse 64% e amvisërive, ose mbi 517.000, shpenzojnë energji elektrike vetëm në bllokun e parë. Për rreth 170.000 amvisëri që do të hyjnë edhe në bllokun e dytë, rritja do të jetë 70 denarë në muaj. Ndërsa për 14.000 amvisëri që hyjnë edhe në bllokun e tretë, rritja është 370 denarë, dhe për 4.400 që shpenzojnë edhe në bllokun e katërt, rritja është rreth 900 denarë në muaj. Kompensimi prej 200 denarësh mbetet pjesë e faturave dhe nuk do të hiqet, tha Bislimoski, sepse analizat kanë treguar se në këtë mënyrë rritja do të ishte më e madhe.
“Nëse hiqet kompensimi prej 200 denarësh, blloku i parë do të rritej për 8,46 për qind shtesë, blloku i dytë do të rritej për 7,19 për qind shtesë, blloku i tretë do të rritej për 5,77 për qind. Blloku i katërt për 2,69 dhe tarifa e lirë për 13,51 për qind”, deklaroi Marko Bislimoski, Kryetar i KRRE-së.
Rregullatori vlerësoi se EVN Home e ka zbatuar sistemin tarifor, por nuk është zbatuar parimi kyç rregullator – balancimi i interesave të kryerësve të veprimtarive energjetike dhe konsumatorëve. Siç thotë Bislimoski, po bëhet kujdes që të mbrohen konsumatorët nga një shok çmimesh.
