Qytetarët e Strugës po përballen me një krizë të heshtur, por të dhimbshme: kreditë e shpejta, të njohura ndryshe si mikro-kredi, po dëmtojnë rëndë familjet me të ardhura të ulëta dhe ato në gjendje të vështirë ekonomike.
Në redaksinë tonë kanë arritur shumë ankesa nga qytetarë që janë futur në borxhe të papërballueshme, duke marrë kredi të vogla që më pas u kthyen në barrë të madhe financiare.
Dëmet kryesore që përmendin qytetarët:
“E mora një kredi prej vetëm 200 eurosh, por brenda pak muajsh më kërkuan të paguaj mbi 500 euro, vetëm sepse nuk munda ta shlyej në kohë,” rrëfen një banor i Strugës.
Shumë kompani aplikojnë interesa vjetore efektive në qindra përqind, që i shndërrojnë kreditë e vogla në borxhe të pamundura për t’u përballuar.
Qytetarët ankohen se përveç interesit, u janë ngarkuar edhe tarifa aplikimi, tarifa vonese, tarifa për zgjatje afati, e të tjera që nuk ishin të qarta në momentin e nënshkrimit të kontratës.
“Një kredi e mbuloj me një tjetër… kështu hyra në një rreth vicioz që s’po më lë të marr frymë,” – shprehet një grua nga Struga.
Mungesa e të ardhurave të qëndrueshme i shtyn shumë qytetarë të marrin hua për të shlyer huat e mëparshme – duke u futur në një spiral borxhi gjithnjë e më të rëndë.
Disa kompani operojnë pa mbikëqyrje të qartë ligjore, me kontrata të paqarta dhe metoda të dyshimta për përmbarim.
Presioni nga përmbaruesit, thirrjet e përditshme dhe frika nga paditë po ndikojnë në shëndetin mendor të qytetarëve, duke sjellë stres, ankth dhe konflikte të vazhdueshme në familje.
Struga Ekspres do të vazhdojë të ndjekë këtë çështje dhe i bën thirrje institucioneve përkatëse që të marrin masa urgjente për rregullimin dhe kontrollin më të rreptë të kompanive të kredive të shpejta, në mënyrë që qytetarët të mos bien viktimë e abuzimeve financiare.
(Struga Ekspres)
