Ministri i Punëve të Brendshme, Oliver Spasovski në mbledhjen e sotme të 100 ka informuar se rregulli nënligjor në lidhje me dhënien e formularëve për letërnjoftimet e reja do të publikohet që ditën e sotme në “Gazetën Zyrtare”, dhe me këtë do të mundësohet të fillojë shtypja dhe dhënia e letërnjoftimeve të qytetarëve sipas kërkesave të tyre të parashtruara.
Siç theksohet në kumtesën e Qeverisë, mbledhja e sotme ishte me pikën e vetme të rendit të ditës në të cilën ishte shqyrtuar Informacioni për tejkalimin e situatës aktuale në lidhje me dhënien e formularëve të letërnjoftimeve të reja.
Në mbledhje Qeveria e obligoi ministrin që t’i ndërmarrë të gjitha aktivitetet e nevojshme për miratimin e rregullit nënligjor sipas autorizimit nga Ligji për letërnjoftime dhe ta harmonizojë me dispozitat e Ligjit për përdorimin e gjuhëve me çka mundësohet dhënia e pandërprerë e formularëve për kërkesë për dhënien e letërnjoftimit, formulari i vërtetimit për kërkesë të parashtruar për dhënien e letërnjoftimit, formulari për letërnjoftimin, procedura për dhënien dhe zëvendësimin e letërnjoftimit, si dhe mënyra e mbajtjes së evidencës për letërnjoftime të dhëna.
Spasovski, siç bëhet e ditur, i informoi kryeministrin dhe ministrat se rregulli nënligjor do të publikohet deri në fund të ditës në “Gazetën Zyrtare” dhe se prej nesër do të mundësohet shtypja dhe dhënia e letërnjoftimeve.
