Enver Xhila zgjidhet në krye të nëndegës së BDI-së në Mislodezhdë
Procesi i riorganizimit të nëndegëve të Bashkimit Demokratik për Integrim po vazhdon në terren, me qëllim forcimin e strukturave dhe përfshirjen e kuadrove të reja në parti.
Në kuadër të këtij procesi, në nëndegën e Mislodezhdës është zgjedhur për kryetar Enver Xhila, një emër i ri që njihet për angazhimin e tij në komunitet dhe që vjen si përfaqësues i një gjenerate të re me energji dhe vizion.
Xhila, një sipërmarrës i ri, konsiderohet si një figurë që sjell frymë të re dhe pozitivitet në organizimin lokal të partisë.
Angazhimi i tij i deritanishëm në aktivitetet politike dhe shoqërore është vlerësuar pozitivisht nga strukturat e partisë dhe anëtarësia.
Në zgjedhjet e kaluara, ai ishte pjesë e listës së kandidatëve për këshilltar komunal nga radhët e BDI-së, ku u dallua si një nga kandidatët më aktivë gjatë fushatës dhe në komunikim me qytetarët.
Zgjedhja e tij në këtë detyrë shihet si një hap drejt fuqizimit të mëtejshëm të nëndegës në Mislodezhdë dhe rritjes së angazhimit politik në nivel lokal.
