Shqipja në “Safe city”: Toshkovski garanton respektimin e Ligjit dhe Kushtetutës
Ministri i Punëve të Brendshme, Pançe Toshkovski përmes një prononcimi të tij ka garantuar respektimin e Ligjit dhe Kushtetutës sa i takon përdorimit të gjuhës shqipe në kuadër të sistemit “Safe city”.
Kjo qëndrim i tij vjen pas akuzave të deputetit të opozitës, Halil Snopçe se qytetarët shqiptarë SMS- porositë i marrin vetëm në gjuhën maqedonase.
“Sipas ligjit të gjitha aktet që do të dalin nga Ministria e Punëve të Brendshme (MPB) do të jenë në përputhje me ligjin. Çdo akt që do të dalë në një formë të përshtatshme nga Ministria e Brendshme, pavarësisht nga metoda e dorëzimit do të dorëzohet në gjuhën e përcaktuar në përputhje me Ligjin dhe Kushtetutën”, ka thënë ministri Toshkovski.
Ndërkohë, edhe zëvendësministri i Punëve të Brendshme, Astrit Iseni e bëri të qartë që njoftimet me SMS nga policia të arrijnë edhe në gjuhën shqipe dhe se ujdi për këtë është arritur në takimin e fundit të liderëve që si çështje të rëndësishme e kishte ngritur njëri nga liderët e VLEN, Bilall Kasami.
Ndryshe, Ligji për kundërvajtje pritet të gjendet nesër në rend dite në Kuvend. BDI parimisht është deklaruar se do ta mbështesë ligjin, derisa LSDM është kundër.
