Zëvendëskryeministri Sali dënon sulmin ndaj ambasadës së Bullgarisë në Shkup
Zëvendëskryeministri i parë Bekim Sali, ka dënuar ashpër sulmin e sotëm ndaj ambasadës së Bullgarisë në Shkup, duke e cilësuar çdo akt dhune dhe vandalizmi ndaj përfaqësive diplomatike, si të papranueshëm.
Ai thekson se siguria e misioneve diplomatike është obligim ndërkombëtar dhe se institucionet e sigurisë tashmë kanë ndërmarrë të gjitha masat e nevojshme për zbardhjen e rastit dhe kapjen e autorit.
“Dënojmë ashpër sulmin e sotëm ndaj ambasadës së Bullgarisë në Shkup, si dhe çdo akt dhune apo vandalizmi ndaj përfaqësive diplomatike. Siguria e misioneve diplomatike është obligim ndërkombëtar, ndaj institucionet tona të sigurisë janë duke i ndërmarrë të gjitha masat e duhura për ta zbardhur rastin dhe për ta kapur autorin e këtij akti. Republika e Maqedonisë së Veriut mbetet e përkushtuar ndaj respektimit të së drejtës ndërkombëtare, Konventës së Vjenës dhe ndërtimit të marrëdhënieve fqinjësore mbi dialog, respekt dhe vlera evropiane”, ka thënë zëvendëskryeministri Sali.
