Një rast i paprecedentë ka dalë në dritë nga Çerdhja e Strugës, ku një punonjëse ka qenë e angazhuar plot 16 vite me radhë me kontratë pune të përkohshme, duke marrë një pagë të mjerueshme prej vetëm 10 mijë denarësh në muaj, ndërkohë që kujdesej për fëmijët e qytetit.
Ky skandal, i cili konsiderohet një nga shembujt më të rëndë të shfrytëzimit dhe pasigurisë në punë në institucionet publike, ka tronditur opinionin dhe ka ngritur pikëpyetje serioze mbi mënyrën se si janë menaxhuar marrëdhëniet e punës ndër vite.
Ndërhyrja vendimtare e ministrit Fatmir Limani
Situata ka marrë kthesë pozitive vetëm pas ndërhyrjes së ministrit të Punës dhe Politikës Sociale, Fatmir Limani, i cili ka ndërmarrë hapa konkretë për t’i dhënë fund trajtimit të padrejtë të punëtorëve në çerdhe.
Sipas informacioneve, të gjithë punonjësit që ishin mbi 2 vite me kontratë të përkohshme tashmë kanë marrë vendime të rregullta punësimi, duke u dhënë atyre sigurinë dhe dinjitetin që u ka munguar prej vitesh.
Punonjës që mbajnë mbi shpinë sistemin, por paguhen më pak se minimalja
Rasti i punonjëses me 16 vite kontratë të përkohshme është vetëm maja e ajsbergut. Raportet tregojnë se në këtë institucion, si edhe në të tjera ngjashme, punonjësit që mbajnë mbi supe barrën kryesore të punës shpesh trajtohen si personel i përkohshëm, pa të drejta, pa siguri dhe me paga nën vlerën minimale.
Pritje për reforma më të thella
Vendimi i ministrit Limani po vlerësohet gjerësisht si hap i rëndësishëm drejt normalizimit të marrëdhënieve të punës në sektorin publik. Megjithatë, qytetarët dhe punonjësit kërkojnë përgjegjësi për drejtuesit që lejuan një situatë të tillë të zgjaste për më shumë se një dekadë e gjysmë.
