Zëvendëskryeministri Fetai mori pjesë më mbrëmjen kushtuar nismës për emërtimin e rrugës “Isa Boletini Way” në Nju Jork
Zëvendëskryeministri për qeverisje të mirë, Arben Fetai gjatë vizitës në SHBA ka qenë pjesë e një mbrëmje të veçantë kushtuar nismës për emërtimin e rrugës “Isa Boletini Way”, një akt simbolik që nderon historinë, rezistencën dhe identitetin tonë kombëtar përtej Atlantikut.
Mbrëmja u mbajt në “Albanian Cultural Center Staten Island” me pjesëmarrje të gjerë të shoqatave të mërgatës sonë së bashku me ministrin e qeverisë se Kosovës dhe kryetarin e sapozgjedhur të Mitrovicës, Faton Peci, si dhe ministrin e qeverisë së Malit të Zi, Fatmir Gjeka.
“Në Staten Island të Nju Jorkut, pata kënaqësinë të jem pjesë e një mbrëmjeje të veçantë kushtuar nismës për emërtimin e rrugës ‘Isa Boletini Way’, një akt simbolik që nderon historinë, rezistencën dhe identitetin tonë kombëtar edhe përtej Atlantikut. Së bashku me ministrin e qeverisë se Kosovës dhe kryetarin e sapozgjedhur të Mitrovicës, Faton Peci, si dhe ministrin e qeverisë së Malit të Zi, Fatmir Gjeka, dëshmuam edhe një herë se bashkimi rreth vlerave kombëtare, kulturës dhe historisë sonë është forca që na mban të lidhur kudo që ndodhemi”, ka thënë Fetai gjatë këtij takimi, duke shtuar se mërgata jonë mbetet faktor i rëndësishëm i promovimit të vlerave tona dhe i miqësisë sonë të përhershme me SHBA-në.
