Iseni për rastin në Kumanovë: Policia veproi sipas ligjit – Sivjet festimet kaluan të qeta, ndryshe nga viti i kaluar
Zëvendësministri i Punëve të Brendshme, Astrit Iseni përmes një postimi në rrjetet sociale ka bërë të ditur se gjatë shënimit të Ditës së flamurit në Kumanovë, disa persona kanë shkelur rregullat duke cenuar rendin publik.
Sipas Isenit, policia ka ndërhyrë sipas ligjit dhe është vepruar pa dallim etnik, duke garantuar që çdo qytetar të trajtohet në mënyrë të drejtë dhe të barabartë.
“Procedurat ligjore për rastet e konstatuara po vazhdojnë, ndërsa MPB mbetet e përkushtuar në ruajtjen e sigurisë dhe qetësisë për të gjithë”, thekson Iseni.
Respektimi i ligjit, shprehet ai, është një detyrë për çdo qytetar dhe nuk do të tolerohen veprime që nxisin tensione apo përçarje.
“Siguria, rendi publik dhe respekti ndaj ligjit janë prioritet për MPB-në dhe do të zbatohen në mënyrë të paanshme, për të garantuar qetësinë e çdo qytetari, pa dallim etnie, besimi apo përkatësie tjetër. Gëzuar festat e Nëntorit! Le të festojmë në paqe dhe me respekt për njëri-tjetrin”, nënvizon zv/ministri Iseni.
Ndryshe nga viti i kaluar, kur në opinion qarkullonin edhe fotografi dhe dëshmi që tregonin se të rinjtë e përfshirë në djegien e flamurit shtetëror kishin lidhje me struktura dhe bashkëpunëtorë të afërt të BDI-së një skenar i cilësuar atëherë si tentativë për të krijuar tensione ndëretnike, sivjet situata ka qenë dukshëm më e qetë. Pas humbjes së ndikimit politik dhe rënies së potencës mobilizuese të BDI-së, nuk është vërejtur asnjë përpjekje e ngjashme për incidente apo provokime gjatë festimeve të 28 Nëntorit.
