Fetai: Bashkëpunimi rajonal, çelësi për forcimin e luftës kundër korrupsionit në Ballkanin Perëndimor
Zëvendëskryeministri Arben Fetai priti sot në takim Albert Hanin, drejtor i Iniciativës Rajonale Kundër Korrupsionit (RAI), me të cilin bisedoi për intensifikimin e luftës kundër korrupsionit dhe përshpejtimin e reformave gjyqësore në vend dhe në rajon.
Në njoftimin e tij, Fetai theksoi se takimi u zhvillua në frymë bashkëpunuese dhe me synim konkret për të forcuar mekanizmat e integritetit institucional dhe transparencës publike.
“Diskutuam për intensifikimin e luftës kundër korrupsionit, përshpejtimin e reformave gjyqësore, si dhe shkëmbimin e përvojave dhe praktikave më të mira mes vendeve të rajonit”, theksoi Fetai.
Ai vlerësoi lart rolin e RAI-t si qendër rajonale e specializuar në koordinimin e përpjekjeve kundër korrupsionit në Evropën Juglindore, duke ndihmuar vendet e rajonit në zbatimin e standardeve ndërkombëtare dhe në forcimin e institucioneve të llogaridhënies.
Fetai shtoi se bashkëpunimi rajonal mbetet thelbësor për ndërtimin e institucioneve transparente, të qëndrueshme dhe efikase, të cilat janë një nga shtyllat kryesore për integrimin e plotë evropian të vendeve të Ballkanit Perëndimor.