Maqedonia e Veriut ndodhet nën ndikimin e disa valëve të lagështa ajri që vijnë nga drejtimi i Mesdheut, të cilat do të ndikojnë në motin e vendit deri të martën, më 11 nëntor. Gjatë kësaj periudhe priten reshje lokale shiu, që herë pas here do të jenë më të dendura dhe të shoqëruara me bubullima.
Erërat do të fryjnë me intensitet të shtuar, ndërsa në disa zona pritet të jenë të forta, kryesisht nga drejtimi jugor dhe juglindor, me shpejtësi deri në 60 kilometra në orë.
Edhe në Shkup dhe rrethinë moti do të jetë i paqëndrueshëm, me reshje të herëpashershme shiu dhe periudha të shkurtra me bubullima. Lokalisht, pritet që sasia e reshjeve të jetë më e lartë, duke kaluar 30 litra për metër katror.
Temperaturat do të mbeten të buta për këtë periudhë të vitit, duke lëvizur ndërmjet 11 dhe 18 gradë Celsius, pra rreth ose pak mbi mesataren sezonale.