Në hyrje të Ohrit, një nismë e veçantë solidariteti ka marrë jetë këtë Ramazan, duke sjellë hapjen e një marketi ku produktet shpërndahen falas për familjet që përballen me vështirësi ekonomike.
Market “Pazari i Gjelbër”, i vendosur në Bulevardin Turistik pranë Bostanit të Madh, është kthyer në një derë të hapur për këdo që nuk arrin të sigurojë ushqimet bazë.
Çdo qytetar në nevojë mund të hyjë, të zgjedhë dhe të marrë produktet e domosdoshme pa procedura formale dhe pa u ndjerë në siklet. E gjithë ideja është ndërtuar mbi parimin e respektit dhe dinjitetit, në mënyrë që ndihma të jepet natyrshëm dhe me mirëkuptim, duke e bërë muajin e shenjtë më të lehtë për shumë familje.
Kjo hapësirë nuk funksionon vetëm si market, por edhe si një pikë bashkimi për komunitetin shqiptar në qytet. Ajo ka mobilizuar qytetarë dhe biznese që të kontribuojnë me produkte ushqimore, duke krijuar një rrjet solidariteti që synon të mbështesë sa më shumë familje gjatë 30 ditëve të Ramazanit.
Organizatorët theksojnë se synimi kryesor është që askush të mos mbetet jashtë vëmendjes dhe përkujdesjes së komunitetit. Përmes kësaj nisme, përcillet mesazhi se uniteti dhe bujaria janë forca që mund të kapërcejnë çdo sfidë, duke e kthyer këtë market në një simbol të gjallë të humanizmit dhe dashurisë për njëri-tjetrin.
