Struga po boshatiset gjithmonë edhe më shumë vit pas viti, dhe kjo boshatisje vërehet më shumë nëpër bankat shkollore, ku me mijëra nxënës janë më pak duke filluar nga viti 2001 dhe deri më sot, informon Struga Ekspres.
Drejtori i shkollës fillore “Ashim Agushi”,z.Shefi Cenka tregon për Struga Ekspres numrin e fëmijëve që do të ulen për herë të parë në bankat e shkollës.
Shefi Cenka tregon se për vitin e ri shkollor 2019/2020,Ladorishti,Frëngova,Zagraçani, Shumi dhe Teferiçi do të kenë vetëm 40 nxënës në klasë të parë, njofton Struga Ekspres.
Në fshatin Frëngovë për vitin e ri shkollor 2019/2020, do të ulen për herë të parë vetëm 10 nxënës, shifër kjo shumë herë më pak nga vitet e kaluara, mëson Struga Ekspres.
Poashtu edhe në Ladorisht, numri i nxënësve për në klasë të parë është 21, duke llogaritur se ky është një nga fshatrat më të mëdha në Strugë.
Shumi dhe Zagraçani, të dy fshatrat së bashku kanë vetëm 5 nxënës që do të ulen për herë të parë në bankat shkollore, ndërsa Teferiçi ka 4 nxënës.
Pra, pesë fshatra, Ladorisht, Frëngovë, Zagraçan,Shum dhe Teferiç,numërojnë vetëm 40 nxënës që do të ulen për në klasë të parë.
Këmbanat po bien me të madhe në Strugë, ndërsa heshtja e institucioneve dhe shoqërisë civile ndaj kësaj dukurie bëhet akoma edhe më e frikshme duke fundosur fshatrat çdo ditê edhe më shumë.
Të gjithë drejtë Gjermanisë, një eksod ky i paparë ndonjëherë në Strugë dhe rrethinë, ndërsa politikanët dhe shumica intelektuale shijojnë luksin e posteve drejtuese.
(Struga Ekspres)
