Osmani paralajmëroi 26,7 milion euro për Shkup – Bllacë
Në faqen e vet të Fejsbukut, Zëvendëskryeministri për Çështje Evropiane, Bujar Osmani, në rolin e koordinuesit për implementim të autostradës Shkup – Bllacë, paralajmëroi se në Konferencën për Ballkanin Perëndimor që vijon në kuadër të “Procesit të Berlinit” në Poznan të Polonisë, janë siguruar 26,7 milion euro, të holla evropiane përmes WBIF, për projektin Shkup – Bllacë.
Projekti Shkup – Bllacë, që paraqet zgjidhje autostrade për lidhje të Shkupit dhe Prishtinës me autostradën Arbër Xhaferi, do të ndërtohet në dy faza. Për fazën e parë prej 2 kilometrash duke filluar nga pika kufitare, siç ishte paralajmëruar edhe më parë, pritet të fillon procedura e tenderimit këtë verë, ndërsa për fazën e dytë, dokumentet e tenderimit pritet të jenë të gatshme në fillim të vitit të ardhshëm.
Shuma e gjithsejtë për ndërtim të autostradës Shkup – Bllacë pritet të kushtojë rreth 110 milion euro, ndërsa projekti pritet të përfundojë në vitin 2023, me çka Shkupi dhe Prishtina do të jenë larg vetëm 40 minuta.
